Letras de cal xorde da constatación de que os novos poetas non teñen doado salvar a necesidade de acceder ao libro impreso.

Mediados os anos 90, un número considerábel de novos autores irrompen na escea literaria galega, en recitais, edicións colectivas, grupos de acción cultural. Mais, a medida que esas novas voces van se consolidando, as limitacións do sistema editorial galego para responder ás súas necesidades de edición fanse máis e máis evidentes.

Dende había xa uns anos, só Espiral Maior publicaba poesía con regularidade. Algunhas outras editoriais tiñan coleccións de poesía mais publicaban (e publican) só un ou dous títulos ao ano. E mesmo as editoriais máis emblemáticas da nosa literatura relegaran a poesía a un segundo plano inmerecido.

Non só os novos autores atopaban problemas á hora de publicar.

Mais ocolectivo era claramente o máis prexudicado.

Dende 1997 Letras de Cal intentou cubrir ese baldeiro. Para iso máis de 15 poetas xuntaron o seu esforzo económico para a publicación dos primeiros dous títulos. A continuación, o esforzo requerido foi outro: os libros cumpría vendelos para poder continuar coa laboura. E vendéronse. E da venda publicáronse mais outros dous, e outros, ata os 12 títulos que viron a luz ata o de agora.

A actividade principal da Asociación Cultural Amaía é, xa que logo, a edición de libros de poesía de novos autores, e a súa difusión. Para iso organiza diversas actividades, como recitais públicos por toda a xeografía galega, e, recentemente, obradoiros literarios que pretenden dinamizar, doutro xeito, a producción poética dos máis novos.